იტალიური მხატვრობის სამი საუკუნე. ტრიესტის ძველი ხელოვნების ეროვნული გალერეის საგანძური

27 სექტემბრიდან 20 ნოემბრამდე საქართველოს დედაქალაქი მასპინძლობს ტრიესტის ძველი ხელოვნების გალერეაში დაცული არაჩვეულებრივი ნამუშევრების ექსპოზიციას “ფერი ტინტორეტოდან კანალეტომდე”. “მნახველს ელის ექსკურსი დროში, სივრცესა და სახვითი ხელოვნების სხვადასხვა სტილში. ეს მიმზიდველი ექსპოზიცია მოიცავს იტალიური მხატვრობის სამ საუკუნეს, გვიანდელი რენესანსიდან მე-18 საუკუნის დასასრულამდე,” – განმარტავს იტალიის ელჩი ანტონიო ბარტოლი.

4 tintoretto ritratto di uomo

იაკოპო რობუსტი, იგივე ტინტორეტო
მამაკაცის პორტრეტი
ზეთი, ტილო, დაახლ. 1550

საქართველოს ეროვნულ გალერეაში წარმოდგენილ გამოფენაზე თავმოყრილია ტინტორეტოს, გუერჩინოს, ბერნარდო სტროცის, ანტონიო კანალეტოს, ჯოვან ლორენცო ბერნინისა და სხვა ფერმწერების 55 სურათი. მნახველს შესაძლებლობა აქვს გაეცნოს იმ ეპოქის ჩრდილოეთ იტალიაში არსებულ ფერწერის ძირითად სკოლებს, ბოლონიიდან (ჯუზეპე მარია კრესპი) გენუამდე (ჯოვანი ბატისტა პაჯი, ჯოაკინო ასერეტო, ჯოვანი ფრანჩესკო კასტილიონე), ლომბარდიიდან (პიერ ფრანჩესკო მაცუკელი და პიერ ფრანჩესკო ჩიტადინი) ვენეტომდე (ბონიფაჩო დე’ პიტატი, კარლო კალიარი, ფრანჩესკო მაფეი, ნიკოლა გრასი).

2 bonifacio veronese madonna tra le sante dorotea e caterina

ბონიფაჩო დე’ პიტატის წრის უცნობი მხატვარი
მადონა ყრმით, წმ. დოროთეასა და წმ. კატერინასთან ერთად
ზეთი, ტილო, დაახლ. 1540-1550

ექსპოზიცია დამთვალიერებელს სთავაზობს იმდროინდელი მხატვრობის სტილებისა და ჟანრების (პორტრეტის, პეიზაჟისა და ნატურმორტის) ვრცელ პანორამას. ისტორიული, ალეგორიულ-რელიგიური და მითოლოგიური თემატიკის ფერწერის გარდა, აქ წარმოდგენილია ყოფის ამსახველი სცენები და ასევე, ანტონიო კანალეტოს ოთხი ესკიზი.

28 lorenzo lippi san francesco e un angelo

ლორენცო ლიპი
წმ. ფრანჩესკო და ანგელოზი
ზეთი, ტილო, XVII საუკუნე

ექსპოზიცია “ფერი ტინტორეტოდან კანალეტომდე” პროგრამა “Vivere ALL’italiana”-ს ნაწილს შეადგენს, რომლის ფარგლებშიც ჩატარებული გამოფენები საქართველოში 150.000-ზე მეტმა დამთვალიერებელმა მოინახულა. ეს ღონისძიება ორი ქვეყნის ისტიტუციებს შორის მჭიდრო თანამშრომლობის შედეგია. იტალიური მხრიდან ეს ინსტიტუციებია: საგარეო საქმეთა და საერთაშორისო თანამშრომლობის სამინისტრო და იტალიის საელჩო თბილისში, ქართული მხრიდან კი – განათლების, მეცნიერების, კულტურისა და სპორტის სამინისტრო და საქართველოს ეროვნული მუზეუმი. ამ გამოფენის ჩატარება საქართველოში ხორციელდება იტალიურ კომპანია Glocal Project Consulting-თან ერთად.

56 canaletto roma san gregorio recto