კიდევ ერთი მნიშვნელოვანი მოვლენა იტალიური ენისა და კულტურის გავრცელებისთვის – ამიერიდან ყველა ქართველი მოქალაქისთვის ხელმისაწვდომია იტალიური წიგნების ფართო არჩევანი, ფილოსოფიიდან ისტორიამდე, მეცნიერებიდან გეოგრაფიამდე, ხელოვნებიდან ლიტერატურამდე.
საქართველოს პარლამენტის ეროვნულ ბიბლიოთეკაში გაიხსნა იტალიური ბიბლიოთეკა, რომელსაც საქართველოს ისტორიაში პირველად უმასპინძლა ქართულმა საჯარო დაწესებულებამ. ბიბლიოთეკა შეიქმნა 4700-ზე მეტი იტალიურენოვანი წიგნის ბაზაზე, რომელიც იტალიის საელჩომ საქართველოს პარლამენტის ეროვნულ ბიბლიოთეკას საჩუქრად გადასცა.
იტალიურ ბიბლიოთეკაში, რომელიც პირველი ქართული ნაბეჭდი წიგნის, 1629 წელს ქ. რომში გამოცემული ქართულ-იტალიური ლექსიკონის თანაავტორის, სტეფანო პაოლინის სახელს ატარებს, უამრავ სხვა წიგნთან ერთად, დაცულია დანტე ალიგიერის “Le opere minori” 1930 წლის იშვიათი გამოცემა.
