იტალიის საელჩო საქართველოში აგრძელებს “ქოლგა თბილისი ფოტო” ფესტივალთან ტრადიციულ თანამშრომლობას და ფესტივალის ფარგლებში გთავაზობთ იტალიელი ფოტოგრაფის, სცენარისტის, თეატრისა და კინოს რეჟისორის, ჯონ რენდოლფ პეპერის ნამუშევრების გამოფენას “იტალიის ფრაგმენტები: 1970-2010“, რომელიც 2022 წლის 8 მაისს, 18:30სთ-ზე “ხელოვნების სასახლეში” გაიხსნება.
ექსპოზიციაზე (კურატორი რობერტა სემერარო) წარმოდგენილი იქნება ადამიანებისა და მომენტების ამსახველი შავ-თეთრი დოკუმენტური ფოტოკადრები, რომლებსაც პეპერი ორმოცი წლის განმავლობაში, იტალიაში მოგზაურობისას იღებდა – ეს გახლავთ “ქუჩის ფოტოგრაფიის” შესანიშნავი ნიმუშები, რომლებიც ძველი დროის რეპორტაჟებს მოგაგონებთ.
