უკვე ტრადიციად იქცა იტალიელ შემსრულებელთა მონაწილეობა თბილისის ბაროკოს ფესტივალზე, რომელიც ყოველწლიურად მასპინძლობს სხვადასხვა ქვეყნიდან ჩამოსულ მუსიკოს-შემსრულებლებს და ანსამბლებს და მსმენელს სთავაზობს, ეზიაროს ბაროკოს ეპოქის მუსიკის ბრწყინვალე სამყაროს.
ფესტივალი, რომელიც ამიერკავკასიის რეგიონში ბაროკოს მუსიკის ერთადერთი ფესტივალია, წელს უკვე მეხუთედ იმართება (13 ნოემბრიდან 13 დეკემბრამდე). დღეს, ფესტივალის გახსნით კონცერტზე, შოთა რუსთაველის სახელმწიფო დრამატული თეატრის მცირე დარბაზის სცენაზე, სხვა სახელგანთქმულ მუსიკოსებთან ერთად წარსდგება ქართველი მსმენელისთვის კარგად ნაცნობი შესანიშნავი იტალიელი ვიოლონჩელისტი დავიდე ამადიო. კონცერტი, რომელიც ჩვენი საელჩოს მხარდაჭერით იმართება, ნამდვილი საჩუქარია მუსიკის მოყვარულთათვის: პროგრამაშია ვივალდის, ლეოს, სკარლატის, გალუპისა და სხვა კომპოზიტორთა მუსიკალური შედევრები. არ გამოგრჩეთ!
ბილეთების შეძენა შესაძლებელია ონლაინ.
