18 სექტემბერს იწყება ბათუმის საავტორო კინოს XVI საერთაშორისო ფესტივალი (BIAFF), რომელზეც წარმოდგენილი იქნება 60-ზე მეტი მოკლე და სრულმეტრაჟიანი მხატვრული და დოკუმენტური ფილმი მსოფლიოს 30 ქვეყნიდან, მათ შორის, იტალიიდან. საქართველოს კულტურული ცხოვრების ამ მნიშვნელოვან ღონისძიებაში იტალიური ფილმის მონაწილეობა ჩვენი საელჩოს მხარდაჭერით ხორციელდება.
“Atlantide” (2021) იტალიელი რეჟისორისა და ვიდეოხელოვანის, იური ანკარანის პირველი სრულმეტრაჟიანი ნამუშევარია, რომელიც ნაჩვენები იყო წლევანდელი ვენეციის კინოფესტივალის სექციაში „ჰორიზონტი“. ეს გახლავთ სცენარის გარეშე, რეალური დიალოგების გამოყენებით გადაღებული ფილმი ვენეციის ლაგუნის ნაპირზე მცხოვრებ, ჩქაროსნული კატერების მოყვარულ ახალგაზრდებზე. ვიდეოს, ნეონის შუქებისა და გამაყრუებელი მუსიკის მეშვეობით, რეჟისორი მოგვითხრობს ორ, ერთმანეთისგან სრულიად განსხვავებულ სამყაროზე - ვენეციის მარადიულ სილამაზესა და ფილმის გმირების ეგზისტენციალურ პრობლემებზე.
