10-15 სექტემბერს ტარდება ბათუმის ხელოვნების საერთაშორისო ფესტივალი, რომელიც იუნესკოს მაღალი პატრონაჟით იმართება. იტალიის საელჩოს მხარდაჭერით ორგანიზებულ გახსნით კონცერტში მონაწილეობას მიიღებს კამერული მუსიკის არაერთი ეროვნული თუ საერთაშორისო კონკურსის ლაურეატი, იტალიელი კლარნეტისტი კლაუდიო მანსუტი, რომელიც რომის, ნეაპოლისა თუ მადრიდის საკონცერტო დარბაზების ხშირი სტუმარია და, ასევე, დიდი წარმატებით გამოდის საფრანგეთის, ავსტრიის, სლოვენიის, გერმანიისა და ნორვეგიის მუსიკალურ სცენებზე.
კონცერტზე, რომელიც 10 სექტემბერს (დასაწყისი: 20:00 სთ-ზე) ბათუმის სახელმწიფო მუსიკალურ ცენტრში გაიმართება, იტალიელი მუსიკოსი შეასრულებს მოცარტის შესანიშნავ კონცერტს კლარნეტისთვის.
ბილეთების შეძენა შესაძლებელია ონლაინ.
სახელგანთქმული იტალიელი კლარნეტისტი ბათუმის შავი ზღვის ხელოვნების საერთაშორისო ფესტივალზე
