ბოტიჩელის სილამაზე და კარავაჯოს სინათლე

5 ოქტომბრიდან 29 ნოემბრის ჩათვლით საქართველოს დედაქალაქი ორ უნიკალურ გამოფენას უმასპინძლებს, რომლებსაც აერთიანებთ სახელწოდება “უნივერსალური ღირებულებები: ბოტიჩელი – სილამაზე, კარავაჯო – სინათლე”. ღონისძიება, რომლის კოორდინატორია იტალიის საელჩო საქართველოში, ორი ქვეყნის სხვადასხვა ინსტიტუციებს შორის მჭიდრო თანამშრომლობის შედეგია. ეს ინსტიტუციებია: იტალიის მხრიდან – საგარეო საქმეთა და საერთაშორისო თანამშრომლობის სამინისტრო, ეკონომიკური განვითარების სამინისტრო, უცხოეთში იტალიური კომპანიების ხელშეწყობის სააგენტო (ICE); საქართველოს მხრიდან – ეკონომიკისა და მდგრადი განვითარების სამინისტრო, ეროვნული მუზეუმი, ტურიზმის ეროვნული ადმინისტრაცია და საქართველოს მთავრობის პროექტი Check-in-Georgia.

fb1

გამოფენა “Venus pudica” განხორციელებულია ტურინის სამეფო მუზეუმებთან და კულტურულ ასოციაცია “მეტამორფოზისთან” თანამშრომლობით. გამოფენილი იქნება ტურინის გალერეა საბაუდაში დაცული “ვენერა”, რომელიც შექმნა რენესანსის ეპოქისა და ფლორენციული ჰუმანიზმის ბრწყინვალე წარმომადგენელმა, იდეალური სილამაზისა და ესთეტიკის ახალი კანონების ავტორმა, გენიალურმა მხატვარმა სანდრო ბოტიჩელიმ.

venere

Rai.Com-ის მიერ ჩაფიქრებული გამოფენა “Opera omnia” იტალიის საგარეო საქმეთა და საერთაშორისო თანამშრომლობის სამინისტროს მხარდაჭერით განხორციელდა. “Opera omnia” “წარმოუდგენელი გამოფენაა” – შუქ-ჩრდილების ოსტატის, კარავაჯოს შედევრების რეპროდუქციების ექსპოზიცია; ქრონოლოგიური, ისტორიული და თემატური მოგზაურობა ბაროკოს ეპოქის ყველაზე მნიშვნელოვანი მხატვრის შემოქმედებაში (რომის პერიოდის ტილოებიდან მხატვრის უკანასკნელ ნამუშევრებამდე), რომელიც აერთიანებს კარავაჯოს 40 ნამუშევრის რეალური ზომების მქონე და მაღალი რეზოლუციის ციფრულ რეპროდუქციებს. ხელოვნებისა და ტექნოლოგიების, წარსულის და მომავლის შეხვედრა ერთიან საგამოფენო სივრცეში, ერთგვარ წარმოსახვით მუზეუმში – ამ ექსპოზიციამ, რომელიც 2003 წლიდან არსებობს, იტალიასა და მის ფარგლებს გარეთ ათ მილიონზე მეტ მნახველს საშუალება მისცა, გაცნობოდნენ ლომბარდიელი გენიოსის ყველა ნამუშევარს.