იტალიურ-ქართული ბიზნეს-ფორუმი, რომელიც ინფრასტრუქტურის, ჭკვიანი ქალაქების და ენერგეტიკის საკითხებს მიეძღვნება

თარიღი:

03/07/2019

4 ივლისს თბილისში, სასტუმრო "Holiday Inn"-ში გაიმართა იტალიურ-ქართული ბიზნეს-ფორუმი, რომელიც საქართველოს განვითარებისთვის სტრატეგიული მნიშვნელობის მქონე რამოდენიმე დარგს, კერძოდ, ინფრასტრუქტურას, სამშენებლო და საინჟინრო დარგებს, ენერგეტიკასა და ურბანულ განვითარებას მიეძღვნა. ბიზნეს-ფორუმი კიდევ ერთი შესანიშნავი შესაძლებლობაა კერძო სექტორში თანამშრომლობის განმტკიცებისთვის, ქართულ ბაზარზე იტალიური კომპანიების არსებობის ხელშეწყობისა და იტალიასა და საქართველოს შორის ეკონომიკური კავშირების გაძლიერებისთვის. ფორუმის იტალიელი მონაწილეები გახლდნენ: იტალიის საგარეო ვაჭრობის ხელშეწყობის სააგენტო (ITA-ICE), SACE-SIMEST (სახელმწიფო ორგანიზაცია, რომელიც ეწევა სადაზღვევო და საფინანსო მომსახურებას ბიზნესის ინტერნაციონალიზაციისთვის), საინჟინრო, არქიტექტურული და ტექნიკურ-ეკონომიკური საკონსულტაციო ორგანიზაციათა ასოციაცია (OICE), სამშენებლო კომპანიების ეროვნული ასოციაცია (ANCE), ელექტრონული და ელექტროტექნიკური კომპანიების ეროვნული ფედერაცია (ANIE) და 30-მდე წამყვანი იტალიური კომპანია. ქართული მხრიდან მონაწილეობდა 100-ზე მეტი საწარმო, სააგენტო, საჯარო თუ კერძო კომპანია.

ღონისძიება გახსნეს საქართველოს ვიცე-პრემიერმა, რეგიონული განვითარებისა და ინფრასტრუქტურის მინისტრმა მაია ცქიტიშვილმა, საქართველოს ეკონომიკისა და მდგრადი განვითარების მინისტრმა ნათია თურნავამ და იტალიის ელჩმა საქართველოში ანტონიო ბარტოლიმ.

ღონისძიების პროგრამაში იყო: უმთავრესი საერთაშორისო საფინანსო ინსტიტუტების, ქართული სამეწარმეო ასოციაციებისა და სახელმწიფო უწყებების პრეზენტაციები, 200-ზე მეტი შეხვედრა "B2B" ფორმატში, OICE-სა და საქართველოს კონსულტანტ ინჟინერთა ასოციაციას (ACEG) შორის შეთანხმების მემორანდუმისა და HIS Consulting-სა და საქართველოს საზოგადოებრივ საქმეთა ინსტიტუტს (GIPA) შორის შეთანხმების მემორანდუმის ხელმოწერა.

ბიზნეს-ფორუმის ორგანიზატორები იყვნენ: იტალიური მხრიდან - იტალიის საელჩო და იტალიის　საგარეო ვაჭრობის ხელშეწყობის სააგენტო (ITA-ICE), ქართული მხრიდან - ეკონომიკისა და მდგარი განვითარების სამინისტრო, რეგიონული განვითარებისა და ინფრასტრუქტურის სამინისტრო, "აწარმოე საქართველოში" და საქართველოს სავაჭრო-სამრეწველო პალატა.

ადგილი:

Tbilisi